政壇：范國威公開信騎劫港人？
有啲直選議員好多時候批評官員時，都大大聲話自己代表緊幾多萬名選民發聲，嗰啲超級議員仲話自己有二十幾萬市民支持，雖然口氣大啲，但都叫做有根有據。
不過，新民主同盟Gary范國威尋日同環保觸覺主席譚凱邦聯合發公開信，要求減少大陸自由行，但封信以「大部分香港市民」作下款，佢哋幾時代表咗「大部分香港市民」呢？Gary封信大致係話過去半年訪港內地客有成二千二百萬人次，比去年同期急升近兩成，如果情況繼續惡化會超出香港承載力，所以佢哋要求政府盡快取消深圳戶籍一簽多行。但睇完成封信，雖然列舉咗好多數字，但都無一個數字證明大部分香港市民都想減少大陸自由行旅客。
Gary回應我哋查詢時就話，以「大部分香港市民」作下款純粹出於政治判斷，並無調查數字作根據，仲話如果有人唔認同，可以批評佢喎！咁不負責任都得，唔知有冇市民咁畀面批評佢呢？
