學前教育也瘋狂 可憐天下父母心

呢，近日唔少幼稚園開始接受學前預備班申請，由於先到先得，吸引大批家長蜂擁而至。有人提早幾日排隊，有人專門請假輪候，有人全家出動，日以繼夜，唔知嘅仲以為有錢分添。有人稱之為「怪獸家長」 ，其實呢啲家長都有難言之隱o架。

試諗吓，報讀幼稚園預備班已經爭崩頭，報讀小學場面咪更加墟冚？冇錯嘞，尋日九龍塘有名校舉辦小一入學講座，學額得一百五十個，出席嘅家長居然多達二千四百人，你都咪話唔得人驚。唉，可憐天下父母心！

冇計喇，為人父母邊個唔想仔女入名校接受優質教育，日後成龍成鳳吖。話時話，家長為仔女輪候學位，大家早已見怪不怪咯，小一派位係咁、中一派位係咁、大學聯招亦係咁，呢啲都好正常，最奇怪嘅係，家陣連報讀幼稚園預備班都要通宵排隊，真係令人嘆為觀止。香港教育到底搞邊科？到底出咗乜嘢問題？

提起香港嘅教育，可以用兩個字形容「失敗」，亦可以用四個字形容「誤人子弟」。回歸十六年來，港府施政無能，教育政策五時花六時變，一時母語教學，一時又語言微調；一時考學生，一時考老師；一時殺校，一時又學額不足；加上通識教育、改變學制等等，兜兜轉轉，搞來搞去，學校無所適從，學生淪為犧牲品，家長怨聲載道。

教育政策混亂不堪，問題又點只咁多吖。就以副學士嚟講，唔少學生花費幾年時間，孭咗一身債，辛辛苦苦攞咗個副學士學位，結果得物無所用，既升唔到大學，又得唔到社會認同，搞到高不成、低不就，前路茫茫，唔知何去何從。嗱，教育局日前公布一一至一二年度副學士就業數據，扣除部分未畢業嘅學生，就業不足或待業率高達一成，你話港府係咪誤人子弟吖！

更離譜嘅係，前朝曾蔭權爵士好大喜功，不自量力，大搞所謂「教育產業」，卒之搞出個大頭佛，變咗「教育慘孽」。而新一屆政府又眼高手低，話就話要撥亂反正，可惜講多過做，到頭來瓣瓣都唔掂。講到底，有因至有果，冇「怪獸政府」，何來「怪獸家長」吖，叮！