Sun奇古怪：Sun潮語：【港龍】
「港龍」的「港」，即「香港式」啦！「龍」者，並非呢棚麻甩仔/佬就係「龍的傳人」，而係香港舊語「熱愛攝影的拍友」之「龍友」（此「友」音「柚」）也！
凡周末假日，旺角西洋菜街行人專用區都有公關公司搭枱擺檔宣傳新產品，他們聘請年輕口靚模作招徠，搔姿弄首，甚或衣着性感來搶奪路人眼球；亦引來一大批騎呢巖巉的「港龍」圍觀影相，場面失笑！
在香港，一提起「港龍」，大家都知此乃以本土為基地的航空公司。但上述顛三倒四的一群騎呢怪「港龍」，絕非「衝上雲霄」的Sam哥或Cool魔般型仔，而係若非頭髮蓬鬆，就係頭油滴到落下巴；衣着漏暴起晒鏡面；講嘢唔「一舊舊」，都必然一橛橛，見到女孩子便會臉紅靦覥，但卻立即飛撲擁過去，高舉裝備奇特的攝影器材，亂影一頓！嗱！呢班「港式毒男攝影愛好者」，就係「港龍」嘞！
何解「攝影師」叫「龍友」呢？又要講解英文外來語！「龍」友的「龍」來自英文「Salon」譯名之「沙龍」。醉心追求優質完美攝影的藝術效果，叫做「打龍」，所以打龍的拍友，現今潮語稱「龍友」！「Salon」一詞，本指美髮廳或高級服裝店，亦可作大宅中的客廳和會客室，後引伸為作家、藝術家等人在名流家中之定期聚會，再喻作凡藝術活動場合，都是「沙龍」，尤以「攝影」更甚！
講番西洋菜街那群「港龍」，佢哋的特徵不在於外貌出眾，而係手上的架生—那套標奇立異攝影裝備。呢班都市怪客除鬥晒架生的新款外，還有咁誇張搞得咁誇張，例如近距離三幾呎，佢哋都會用成兩呎長嘅長火（又叫「長炮」）鏡頭對準「獵物」，唔知係咪想影人家鼻頭粒酒米？
港龍們最滿意的收穫，就係擒高爬低，影到美少女的事業線或低炒的小三角地帶，也是每周出巡辛勞的回報！
