行政會議成員鄭耀棠及八名唔同黨派嘅立法會議員，早前帶埋家屬接受國泰航空免費款待，豪遊法國接收新飛機，被指涉嫌存在利益衝突。有熟悉國泰運作嘅知情人士透露，請議員參加「收機團」已經舉辦咗好多年，一直都冇人話過有問題，但依家社會對議員同公職人員嘅期望變咗喎。

有關人士話，每一架新飛機由外國收回到香港之後，都必須經過民航處最後審批，先至可正式作商業用途，所以收飛機呢一程本身並無任何商業成分，而佢哋除咗邀請議員收飛機外，仲會邀請學生參與，總之務求唔好浪費呢一程飛機嘅燃油。不過，係咪所有參加收機團嘅人，例如學生同慈善機構嘅人，都可以享受議員所得嘅豪華享受呢？公眾好想知喎。

第一手消息請下載on.cc東方互動iPhone/iPad/Android/Windows Phone Apps