政壇：曾偉雄寸人戴有色眼鏡
最近好多涉及警方執法嘅爭議，有人質疑點解公務員事務局日前要向警隊頒發最佳公眾形象銀獎。警務處處長曾偉雄尋日出席香港警察學院結業禮時，就力撐呢個形象獎好有公信力，佢話：「我想同大家講一講形象究竟係咩一回事，今日陽光普照，我就無戴有色眼鏡，我睇綠色就見到綠色，紅色就見到紅色，但在座咁多位有啲戴咗太陽眼鏡，睇嘅顏色就唔一樣」，暗示外界唔好用有色眼鏡睇警隊。
曾偉雄（左）昨陪同公務員薪俸及服務條件常務委員會主席王英偉（右）檢閱學警畢業。
叫林慧思盡快落口供
曾偉雄又力撐公務員事務局嘅評審工作嚴謹，話如果周邊治安良好，咁警察理應得到認同，獲獎係理所當然嘅，叫外界以平常心看待警隊獲獎。佢又話，有兩個國際級嘅調查亦反映香港警察服務同治安評價屬全球頭幾位，值得參考吓。另外，之前講粗口辱罵警察嘅小學教師林慧思報稱收到刀片恐嚇信件，希望可以申請人身保護令。曾偉雄就希望林慧思盡快去警署落口供提供詳細資料，否則好難評估佢嘅人身安全係咪真係受到威脅。
