香港教育問題多多,更被批評搖擺不定、忽左忽右。第二屆中學文憑試放榜至今,中史復科、通識科應否列必修都有好多爭議,立法會議員梁美芬早前率成員約見教育局局長吳克儉(吳得掂),要求取消公開試中通識題嘅必答部分,甚至研究通識科係咪應列入必考範圍,唔係必考、亦等於唔係必修啫。唔通推行幾年、公開試考得兩年嘅通識科要被踢出四科必修嘅神聖地位?學界好關注,但吳得掂局長卻聲都唔聲、當冇件事咁。不過,抱病休養嘅前教育局局長孫明揚出席一個活動時就忍唔住,義正辭嚴反擊:「(通識科)唔改得!」

設計圖片及對白

孫公執掌教育多年,更係334學制改革由籌備至落實嘅最關鍵問責局長,深諳官場規則嘅孫公退出之後,一心靜養,被問到新一屆政府嘅教育政策、甚至吳得掂局長嘅表現時,佢都微笑封嘴,不發一言。

逼學生哥關心身邊事

離開官場多時嘅孫公同太太日前出席一個活動時,見佢精神奕奕,身體唔錯,被問到通識科一事,佢即刻好主動回應,立場堅定話一定唔改得,事關通識作為主修科至可以逼學生哥關心身邊事物,培養下一代正確嘅做人態度。孫公並唔認同團體指通識試題涉及太多政治議題,佢強調,除咗政治議題外,仲有好多議題值得年輕人關注喎。

孫公嘅表態,真係值得吳得掂局長學吓嘢,通識科開科未幾,縱有推行上嘅瑕疵,但教育界中人應該睇到呢一科對學生及青年人嘅正面幫助,事事都採含糊立場,試問官員點樣體現問責呀?

第一手消息請下載on.cc東方互動iPhone/iPad/Android/Windows Phone Apps