假難民橫行老蘭 執法者束手無策

唔知嘅話，可以睇本報一連三日嘅「sun驚奇」，睇吓非洲幫同南亞幫點樣利用難民身份留喺香港，點樣將蘭桂坊變成烏煙瘴氣嘅人間妖域。非洲幫搵食如魚得水，正如佢哋話齋，「伊克艾絲伊夫伐來由爛鬼」，即係「我愛爛鬼坊」咁解！

不過咁，非洲人愛蘭桂坊啫，港人就未必喇。呢，部分非華裔人士晚晚喺度破壞生事，販毒、打交、搶劫樣樣做齊，嚴重影響區內治安，搞到旅客望而卻步，生意大受影響，商戶叫苦連天。有食肆負責人反映，店內每星期最少發生四次打鬥事件，根本無法正常營業。

蘭桂坊淪為人間妖域，當局係咪應該嚴厲掃蕩呢？即係咁，警方雖然經常敲鑼打鼓話要整頓老蘭，可惜講就天下無敵，做就無能為力，舊年全年涉及蘭桂坊嘅毆打、傷人被捕人數總共只有三十八人，今年上半年亦只得十五人，當中涉及毒品嘅被捕人數更加少到匪夷所思，舊年全年只得二十人，今年上半年只得一個咁大把。咁嘅辦事效率，與其話係打擊罪案，不如話係姑息養奸，難怪不法分子有恃無恐啦，叮！

有消息人士話喎，警察無奈爛仔何，皆因唔識非洲話。事關非洲幫成員非常蠱惑，明明識講中英文，但每逢差人查問或者落口供，佢哋就故意用非洲土話亂噏廿四，雞同鴨講，聽到啲差人一頭霧水冇晒符。久而久之，唔少警員都會盡量避免處理呢啲工作量又多又麻煩嘅畸士，多一事不如少一事，少一事不如不做事。

除咗警方束手無策，司法機構亦老鼠拉龜。由於非洲有近一千種方言，經常連法庭傳譯都唔識，被迫向領事館求助，當局有時甚至要出埋機票同食宿，去非洲請傳譯員專程來港處理，除咗拖延審訊進度，仲要耗費大量公帑。

所以話，港府根本就係自己捉蟲。港產官僚假仁假義，收留大量非洲難民，搞到亂象叢生，旅遊勝地變成九反之地，咁對香港人公平咩？花費大量公帑為呢啲所謂難民執手尾，對納稅人又公平咩？

計太一叮話齋，整頓老蘭，維持治安，最公平又最徹底嘅辦法就係盡快檢討難民政策，踢走所有為非作歹嘅假難民。如果港府連咁都做唔到，不如掉番轉頭，將啲廢官送去非洲做難民好過，叮！