那件親共愛黨的香港特區立法會議員鼠王芬，眼見香港教育通識科愈來愈「太自由」、「太政治化」，遂巧立爐灶，名為「關注通識教育聯席會議」，首要任務，即使不能打沉廢除「通識科」，也先要「任教的老師必須申報政治立場」！點不知，此言一出，即遭香港一批二流評論員圍剿，嚇到鼠王芬借老公條腰骨出事作藉口，臨時取消「研討會」，無得出風頭，真弊！你錫住老公條腰啦！

嗱！鼠王芬被一群愛反對而反對的「偽愛字派」打到夾鼠尾而逃，我就偏偏要為贊成而贊成去撐佢，等佢唔使做過街老鼠！

喂！鼠王芬無錯喎！香港有言論自由啫！講吓唔得呀！佢要教師申報政治立場，係為學生好啫！如果唔係，點知啲老師有冇教啲學生唔愛國o架！你哋知唔知「愛國」係好重要o架？否則，啲日本仔打到嚟，或要派兵去韓戰，邊度搵人肉盾牌擋子彈呀？

嗱！我覺得唔止要老師申報政治立場，更應先由校長做起，還有校董會成員，連洗廁所的校工都要申報！唔單只入職時發誓填報，仲要每日返工打卡後申報一次，點知佢哋會唔會「忽然轉軚」，「突然民主」o架？

仲有，為整個香港特區好，唔止校長、老師要申報政治立場，連啲法官、律師、記者都要，否則，偏頗起上嚟，咪對另一邊唔持平公道？

將來，入醫院都要申報，否則，同你施手術嘅醫生唔係「意見相同」嘅，咪好大鑊！

在種種有百利而無一害的原因底下，我萬二分支持喺國內受過正統愛國教育嘅鼠王芬議員申報政治立場！喂！芬姐，你係唔係「愛字頭」o架呢？申報吓好喎！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東方互動iPhone/iPad/Android/Windows Phone Apps