SUN搞作：少膽虫手記：條脷與「八婆」
自從《爛果》同香城家長之首結怨後，淫賤黎時時刻刻都想報仇，得知家長之首開茶敍廣邀傳媒，淫黎就話要拉埋少膽虫去踩場，不過跟官咁耐點會唔知官性格，一句到尾，淫黎咪又係想黐飲黐食……
「少膽虫，行快啲喇，慢半拍你就知死。」淫黎邊疾走邊催促少膽虫。入到會場，淫黎難抵慾望，搞到一地都係……舔舌而下的唾液，少膽虫自然輕拍淫黎膊頭，以作提示︰「腦細，條脷、條脷！」豈料換來是淫黎一臉不耐煩，喝道︰「咪再條我，我依家好忙！」
此話觸動香城家長之首的神經，「邊個？邊個講嘅？係咪又要我拉左打右！」人群慢慢散開，道之盡頭自然係淫黎。「哦，又係《爛果》腦細同腦腫，我無請你哋嚟喎，咦……條脷、條脷！」一陣高音破音，終於令淫黎驚醒︰「好喇，八卦婆娘，條完我未呀，係咪阿豬阿狗講句粗口你都要理，我唔搞你，你嚟條我？正一八卦婆、八卦婆！」
「咁你又八婆完未呀？」家長之首一句反問，令淫黎終發覺自己已成為眾矢之的，只好與少膽虫頭耷耷離開……
