城中鏡：靚爆名人齊撐港產創意
香港傳藝中心積極推動本地創意及設計工業，早前佢哋舉行「香港傳藝節．仁濟慈善晚宴」，頒獎予榮獲「十大傑出設計師大獎」等獎項嘅人士，同時連續第八年為仁濟醫院籌款。城中唔少有心人到場，既撐本地設計師，又為仁濟嘅慈善工作盡一分力。
慈善晚宴獲不少名人支持。左起：周國豐及黃泳霖夫婦、陳燭光、鄧宣宏雁及鄧鉅明夫婦。
香港傳藝中心校長吳子文、仁濟副主席蘇陳偉香、太子珠寶鐘錶主席鄧鉅明夫婦、名媛陳燭光（Zandra）及周國豐夫婦等城中名人均有現身，現場十分熱鬧，呢一晚嘅主角之一係設計師，到場嘉賓嘅衣飾都特別花心思，好似最近搞咗盤新娘化妝及影相生意嘅Zandra，就頭戴花花頭箍、打扮得好夢幻，滿場衣香鬢影。
