城中鏡：黃進達派紫色炸彈夠「搶」
暑假剛過，名人圈先後傳來喜訊。康泰旅行社總經理黃進達（Jason）本月二十六號就會踏入人生另一階段，迎娶任職投資銀行嘅女友陳婷婷（Tania），為咗呢件人生大事，佢事前準備做到足，仲特登瘦身，以最佳狀態做新郎哥。
黃進達（左）同女友嘅喜帖，近日已陸續送達好友手中。
快將做老襯嘅Jason，近期紛向親朋好友派喜帖，唔少好友都已經一帖在手，呢張紫色請帖顏色特別，較傳統嘅紅色較為搶眼，咦？會唔會當日舉行婚宴嘅灣仔會展擺酒會場都會有特別布景或主題呢？本來想Jason早啲揭盅，但佢話，因為自己工作太忙，所以一切婚禮籌備都係交晒畀Tania全權負責喎！不過，有樣嘢佢係可以話畀大家聽，就係經過連串運動，佢已成功減十幾磅，希望喺婚禮上以最佳狀態示人。
