城中鏡：本土設計「圓」美嫁衣
「玩具大王」蔡志明嘅囝囝蔡加讚（Karson）與汪圓圓將於十一月舉行婚禮，將披嫁衣的汪圓圓搵咗時裝設計師丘雪祺（Cecilia）為佢嘅世紀婚禮設計晚裝及裙褂，實行以行動支持本地設計。圓圓透露，到時佢會着傳統嘅裙褂，但晚裝唔係訂造太多套，因為唔想換太多次喎。
即將嫁入蔡家做少奶奶嘅汪圓圓（左），搵好友丘雪祺為婚禮晚裝及裙褂設計操刀。
汪圓圓（左）好聽未來老公加讚話，連度蜜月去邊都要佢揸主意。（資料圖片）
蜜月地點加讚話事
Karson事先張揚將婚禮籌備大權交畀圓圓，咁婚禮係咪佢夢想咁樣？圓圓笑笑口話，以前佢的確覺得一生人結婚只得一次，自然要追求完美，但依家就覺得最重要係人，同家人及去見證婚禮嘅賓客享受晚宴，才是婚禮重點。咁決定去邊度蜜月？圓圓甜絲絲話：「由加讚決定，我同佢講，你決定去邊，我都跟住你！」真係幸福滿瀉。
Cecilia就盛讚圓圓身材好完美，佢唔止幫新娘設計旗袍、裙褂等晚宴禮服，仲包辦汪家父母及合共二十位兄弟姐妹團禮服嘅設計，佢笑言好緊張，因為自己都係姐妹團之一，面對咁多靚仔靚女，自己更加要努力保持最佳狀態至得。
