政壇：搞搞政：沈祖堯籲勿做怪獸家長

另類方式愛錫兩女

沈祖堯話依家啲學生年紀較輕，大都係家長嘅金叵羅，唔少家長對子女都過於緊張，譬如曾經有醫科畢業生嘅家長向佢投訴，話做咩要佢個仔on call咁多個鐘咁辛苦，仲有媽媽幫仔女填入職申請表添！面對呢啲「怪獸」行徑，沈祖堯只好一再苦口婆心，自己就發誓點都唔做怪獸家長。

沈祖堯嘅兩個女都係大學階段，佢認為，要畀兩個女兒多啲空間，由佢哋自己選擇將來嘅路，雖然沈校長把口就話唔會好太過溺愛下一代，但佢就以另類方式愛錫兩個女，好似大女依家讀緊醫科三年級，有臨床問題唔明嗰陣，沈校長除咗會親身指導外，仲會扮埋病人畀個女學習診症。

呢個暑假中，沈校長同太太帶埋細女去咗美加參觀大學，為細女下年升讀大學做好準備。點知參觀期間，撞正有班內地家長，認得佢係中大校長，於是捉住佢唔放，要佢介紹吓中大嘅學習環境，搞到佢好尷尬，擔心被當地嘅校長鬧佢踩場兼搶客喎。