政壇：巡學校亂噏 吳得掂認衰
教育局局長吳克儉前日視察開學日期間話要同副局長楊潤雄「分道揚鑣」，唔知嘅以為佢哋是但一個劈炮唔撈，大家爭相了解劈炮疑雲時，至知原來係「吳得掂」局長口快快講錯嘢，佢尋日出席一個午宴時就借機會認衰，話只係想同楊潤雄「兵分兩路」去視察唔同學校，吳克儉表示，下次出席活動會慎言啲！
吳克儉話前日係想講「兵分兩路」視察學校，但口快快講錯變成「分道揚鑣」。
「分道揚鑣」誤解分工
究竟吳得掂個心係咪想同楊潤雄「分道揚鑣」就唔知喇，但自從去年國教科風波之後，就同新聞秘書李黎式暉（Mary）「分道揚鑣」，搵咗張志明（Roger）頂替。
新聞團隊前日就主動幫佢補鑊，話「分道揚鑣」同「分工」意思差唔多，所以將「分道揚鑣」刪去。新聞官咁醒目，難怪吳得掂似乎都幾滿意新團隊，話同事之間經驗多咗、溝通多咗、摸得熟落咗、默契多咗，落實政策都順暢啲喎。
