政壇：城大頒博士銜予鳩山由紀夫
大學頒授榮譽博士學位近年不時鬧出是非，城市大學尋日宣布向日本前首相鳩山由紀夫頒發榮譽博士學位，翻查鳩山講話同動向，城大頒呢個博士學位難免招來政治動作之疑。鳩山由紀夫係日本前首相，雖然係日本民主黨嘅創始人之一，但佢言論同日本民主黨以至成個日本政界都好唔同，今年七月已被日本民主黨開除黨籍。
城市大學尋日宣布向日本前首相鳩山由紀夫頒發榮譽博士學位。（資料圖片）
熟悉日本新聞就知道，鳩山言論向來親華，尤其係釣魚島立場上，佢更加多次表態維護中方，例如中方批評日本竊取釣魚島，佢都話咁講係有道理。即使今年七月被迫退黨後，鳩山繼續勇猛親華，早前訪京時接受傳媒專訪，又自爆老婆學唱國家領導人夫人彭麗媛名曲《在希望的田野上》。今次城大頒個榮譽博士學位畀佢，究竟係因為佢喺日本政界嘅作為，定係因為佢嘅親華友好舉動，真係耐人尋味喇。
