政壇：但斌逆市掃茅台博反彈
內地頂級白酒茅台喺本港官場及商界都有好多捧場者，不過，近期佢嘅走勢認真麻麻，前幾日更公布咗一份「史上最差半年」業績，雖然係咁，佢嘅忠心粉絲都冇跳船，茅台嘅超級粉絲兼內地知名投資人但斌就逆市力捧，尋日喺微博落咗一年嘅賭注，話雖然深信白酒企業躺着賺錢嘅日子一去不復返，但仍然對茅台好有信心：「如果去到明年九月十一日，茅台嘅股價冇三百元嘅話，我就請客吃飯！」
自從中央實行「限制公務消費」政策以嚟，內地白酒業同高級消費一樣，都冇運行，即使A股龍頭股、被譽為中國國酒嘅貴州茅台都不可幸免，日前，茅台公布「史上最差半年報告」，話公司上半年營業收入一百四十一億元（人民幣．下同），同比增長百分之六點五，只係比○三年「沙士」嗰陣好少少咋！而淨利潤得七十二點五億元人民幣，同比增長只有百分之三點六，係公司自○一年上市以嚟最差嘅業績！消息公布之後，茅台股價星期一開市即時低開百分之五點二，唔夠十分鐘仲跌到「停牌」添呀！就連瑞銀證券都將茅台嘅目標價由二百五十六元下調到二百三十八元呀，好多散戶都即刻沽貨走人。
