去年立法會選舉,民主黨本來力捧葵青區區議員尹兆堅,班黨大佬覺得佢打得又講得,仲諗住建議佢去選超級區議會添,點知最後突然退選,事隔一年,尹兆堅唔肯出選似浮上水面,佢向本報披露,五年前曾有婚外情,半年後先決定斬纜,雖然獲愛妻原諒,但佢都覺得好慚愧。佢又話如果呢個炸彈五年後、十年後至引爆,咁樣對老婆、一對仔女會傷害更深,所以同老婆商量後決定公開婚外情一事。

尹兆堅忽然自爆曾經有婚外情。(資料圖片)

關係維持半年

尹兆堅憶述,大約五年幾前,即係○八年立法會選舉前夕,當時佢剛剛脫離街工,又未加入白鴿黨,當時佢同太太成日鬧交,彼此感情好差,差到鬧離婚嘅地步。點知呢個時候,佢就認識一個二十幾歲嘅女仔,結果兩人開始咗一段半年嘅關係。佢話當時已經無晒理性,完全唔醒覺做錯咗,同第三者出街食飯睇戲仲試過被朋友撞破添。直至半年後,佢醒覺唔可以繼續落去,決定揮刀斬情根,唔再同嗰個女仔聯絡。老婆知道後當然好嬲啦,足足用咗幾個月時間先肯原諒佢。

本來呢件事唔想公開,但自從去年有意參選立法會後,無論黨內、外都有人傳佢有婚外情,好多人仲加鹽加醋,話親眼目睹佢同個女仔去「開房」,所以突然退選,唔多唔少都同呢單嘢有關。點都好,佢依家自爆,係咪能夠獲得選民原諒實在好難講,睇嚟佢都係想盡地博一鋪,希望洗底後再戰立法會,否則分分鐘連任區議員都成問題。

第一手消息請下載on.cc東方互動iPhone/iPad/Android/Windows Phone Apps