政壇：德成局長奸招玩區議員
香港嘅舖租貴到離譜已經唔係新鮮事，為市民服務嘅區議員每月得嗰兩萬幾蚊營運開支津貼，想話有瓦遮頭唔使做「無殼議員」都幾艱難。民政事務總署早前回覆觀塘區議員嘅提問時，就自爆原來民政事務局同該署已經度咗條絕世好橋，研究搵啲空置嘅官地、再擺放貨櫃就可以畀區議員做臨時辦事處喇！曾德成呢招慳皮新橋夠創意，睇嚟香港好快會有首批貨櫃議員喇！
設計圖片及對白
水電自駁兼熱爆
白鴿黨觀塘區議員黃啟明早前被本報踢爆，違規租用住宅單位作為區議員辦事處足足八年，被揭發後梗係衰收尾。不過，黃啟明早前都向總署訴苦，反映區議員租用議員辦事處艱難，總署就話，明白部分地區冇公共屋邨畀議員申請做議辦，並透露佢哋研究喺空置官地以貨櫃形式作為臨時辦事處。
區議員月薪二萬二千元，每年只係得大約二十九萬營運辦事處開支津貼，平均每月可以使二萬四千多元，但津貼除咗交租，仲包埋燈油火蠟、議員助理份糧、印製宣傳品等所有開支，所以好多議員都租住公屋地舖慳錢，但唔係每個區都有屋邨，尤其係商業區、甚至銅鑼灣、中環呢啲甲級地段，租金動輒天價，興建「貨櫃議辦」都未必唔可行。
不過，要區議員屈喺個貨櫃內，冬天都還可以，焗熱嘅夏天肯定人都焗熟，仲要四出搵廁所解決，都仲未計自行駁水駁電，所以辦事處配套係一個好大嘅問題。不過，貨櫃辦事處亦有好處，如果區議員將來想轉戰其他區，搬辦事處就夠晒快喇，用貨櫃車一拖就搞掂，連新裝修都慳番。總體來說，唔講「貨櫃議辦」嘅好壞，但就反映現今做區議員嘅悲哀，連一個四四正正嘅竇口做嘢都冇。
