旅遊作家James項明生唔知係咪成日去旅行，冇時間打理銀行戶口，最近佢執屋時就發現一本已「沉睡」二十年嘅華僑商業銀行紅簿仔，入邊仲有四千多元。James執到錢梗係開心喇，點知有關銀行早已被中國銀行收購，若要查數就要畀每半年一百元，即合共四千元嘅手續費，仲未計咁多年嘅不動戶口服務費，所以早已「輸凸」。

項明生覺得白白冇咗四千多元好唔抵。

James見財化水都覺得好肉赤，於是喺社交網站將慘痛經驗公諸於世。結果引起好大回響。有人話早前發現父母亦有兩本紅簿仔，但係戶口啲錢都係被銀行「自行處理」吞晒。話時話，可能好多公公婆婆都有類似遭遇，唔知銀行「沒收」人哋咁多錢，仲有無商德呢？

James咁大懵，皆因佢有幾個銀行戶口，又搬過幾次屋，嗰本擺喺櫃桶底嘅紅簿仔先至塵封咁多年。佢話當年啱啱畢業工作一年多，月薪六千元，所以嗰四千元都唔係小數目。佢仲異想天開話，嗰本紅簿仔咁有歷史價值，中銀好應該回收做收藏，然後捐四千元畀慈善機構小母牛，咁就皆大歡喜喇！

第一手消息請下載on.cc東方互動iPhone/iPad/Android/Windows Phone Apps