搞咗一大輪,通訊事務管理局上個禮拜發表調查報告,裁定亞洲電視主要投資者王征干預電視台運作,違反發牌條件,向亞視罰款一百萬元兼且要求亞視喺七日內終止盛品儒嘅執行董事職務。

莫乃光喺社交網站大呻亞洲會嘅集會好嘈。

支持亞洲電視嘅亞洲會尋日拉隊到政府總部集會力撐亞視,準備執包袱嘅盛品儒自然成為主角,但人多難免會人聲嘈雜。

眾所周知,政府總部隔籬就係立法會大樓,喺大樓辦公室做緊嘢嘅資訊科技界議員莫乃光似乎按捺不住,喺社交網站留言大呻樓下集會好嘈,認為啲人與其咁騎呢去爭取,點解唔正經做好啲節目呢?

莫乃光又話政府當然係針對亞視,而且針對得唔夠添,因為電視台做得唔好,與人無尤喎!

第一手消息請下載on.cc東方互動iPhone/iPad/Android/Windows Phone Apps