著有暢銷書《好水》嘅世界知名鑑水師馬薩（Michael Mascha），早前來港主持一場天然礦泉水品嘗會，解構樽裝礦泉水嘅奧秘。莎莎化妝品老闆郭少明次女Kitty郭詩雅、仁濟醫院前主席嚴玉麟囡囡Carmen嚴紀雯同專業形象指導Angel李玫玫等城中靚女都去捧場，事關飲啱水，對皮膚同健康影響好大，點可以等閒視之？

郭詩雅（右）同李玫玫結伴品鑑天然礦泉水。

嚴紀雯（左）現身支持仇曼瑩創辦嘅水生意。

世界知名鑑水師馬薩（右）同仇祖薰因水而結緣。

好少喺香港公開現身嘅Kitty，三年前被派到上海工作，現任莎莎中國業務拓展總監，佢話間唔中會返港見吓朋友同家人，今次特登同好友Angel嚟學嘢。Angel就話早前介紹Kitty飲鹼性礦泉水，感覺好清新，皮膚都靚咗，所以今次為扮靚齊出動。

礦泉水13℃最正

Carmen專誠嚟為做天然鹼性水生意嘅好友Karen仇曼瑩打氣。當日Karen同弟弟仇祖薰相當忙，事關佢哋喺黑龍江搞盤水生意，水質純淨得到飲遍天下好水嘅馬薩讚賞，令佢哋好鼓舞。佢哋爸爸兼米芝蓮星級食肆新斗記老闆仇詩傑同太太Flavia，亦去幫手招呼賓客。馬薩話十一年前因病而被迫戒酒，於是開始鑽研樽裝水，發現水具有獨特嘅奧妙。佢話以攝氏十三度品嘗礦泉水風味最佳，叫大家千祈咪加冰，若以唔同嘅水同美食配搭，驚喜同美酒不分伯仲喎！

第一手消息請下載on.cc東方互動iPhone/iPad/Android/Windows Phone Apps