政壇：搞搞政：舔盡收機團EQ成黨友箭靶
行政會議成員鄭耀棠同八名各黨派嘅立法會議員，攜眷帶女參加國泰航空豪遊法國「收機團」備受各界批評，當中又以建仔嘅EQ葛珮帆「舔到盡」，偕老公提早一周去完德國先轉飛法國，兩人四張機票由國泰埋單。建仔中委會前晚開會時檢討豪遊事件，EQ就死撐自己無錯，據聞仲將有份去豪遊嘅葉國謙擺上枱做擋箭牌，企圖甩身，確係上樑不正下樑歪。
設計圖片
據聞EQ喺中委會上話，佢喺「收機團」事件爆出之後已想話自掏腰包捐錢，但就指阿謙率先企硬唔道歉、唔捐錢，搞到佢左右做人難，當然要跟住大佬嘅立場喇。雖然會上嘅中委聽完解釋後冇再狙擊佢，但部分中委喺會後不禁圍插，暗批佢為求甩身，不惜擺阿謙上枱。有中委仲批評佢事後一直唔見影，枉黨主席譚耀宗日前親自解畫，力撐佢同阿謙無違黨紀。
EQ向我哋澄清冇龜縮，解釋去程機票係國泰建議埋單，聲稱出發前已徵詢譚耀宗，加上唔少黨派嘅「大佬級」議員都參加，估唔到佢眼中嘅「正常社交活動」都惹禍，感覺自己「中伏」喎！佢仲透露，上任後曾獲國泰邀請去西雅圖同法國「收飛機」，但兩次都因要返立會開會而婉拒咗，估唔到今次撞啱休會，第一次參加就慘成箭靶。有中委認為，EQ應該有錯就認，甚至大可以「立會新丁」為由望市民原諒。而其他肯回水嘅「團友」都捐五萬元贖罪，EQ「跪低」後亦只肯補回一程機票，實在講唔過去。
