政壇：食衞局宣示石門用地權
尋日講過運輸及房屋局同食物及衞生局鬥搶沙田石門安興里一幅用地，一時話用嚟起公屋，一時又話用嚟興建骨灰龕，兩個政策局分別為生人同死人鬥搶地，除咗見到土地不足嘅問題外，仲反映兩局之間嚴重溝通不足。
不過，事隔唔夠半日，食衞局回覆本報，話石門笪地已交由食衞局用作興建骨灰龕，又強調有關土地最適合用作發展骨灰龕，疑似宣示土地主權。
食衞局發言人話，為咗增加公眾骨灰龕位嘅供應，政府推動以地區為本嘅骨灰龕發展計劃，並喺十八區物色到二十四幅可供考慮發展骨灰龕設施嘅用地。
發言人又話，食衞局早喺二○一○年七月，就已經公布揀定石門安興里為骨灰龕選址，又話同食環署一直全力跟進有關工作，並已完成交通影響評估同技術可行性研究，稍後會就初步設計及交通安排諮詢區議會意見。
