政壇：聯儲局局長人選鬥身家
美國聯儲局估領袖遊戲去到關鍵時刻，前財政部長薩默斯（Lawrence Summers）同埋聯儲局女副主席耶倫（Janet Yellen），係公認嘅熱門，為咗令大家更「了解」候選人，傳媒已起埋佢哋嘅身家底細，等大家「秤下」。
耶倫
薩默斯
《華爾街日報》引述美聯儲披露嘅資料顯示，喺克林頓時期做過財政部長嘅薩默斯，依家並非公職人員，唔使公開披露自己最新嘅資產淨值，但睇番一○年佢最後一次披露身家，當時已有七百二十萬至二千四百五十萬美元（約五千五百八十三萬至一點九億港元），究竟總數升咗定跌咗，就不得而知嘞！
佢嘅「勁敵」耶倫，係身家水平上，就輸咗畀薩默斯。資料顯示耶倫同佢老公George Akerlof（曾獲諾貝爾經濟學獎），喺一二年嗰時，都有成四百八十萬至一千三百二十萬美元（約三千七百二十三萬至一點零二億港元）身家o架。
論身家高低，薩默斯同耶倫兩個都係「重量級」人物，相比之下，現任主席伯南克舊年嘅身家就少好多，只有一百一十萬至二百三十萬美元（約八百五十三萬至一千七百八十三萬港元）咋！
雖然薩默斯同耶倫各有支持者，但聽講近日就傳出薩默斯先係奧巴馬嘅心水人物，事關佢唔單止係白宮前首席經濟顧問，而且佢曾經喺花旗集團同埋對沖基金公司DE Shaw做咗好多年，對華盛頓同華爾街都有一定嘅人脈關係同了解。
