政壇：馮英倫跟新金王搵真銀
前候任特首辦項目主任嘅Allen馮英倫，離開政界後積極勇闖商界搵真銀，短短一年內轉過三份工，最新動向係幫「新金王」金至尊集團主席Kennedy黃英豪打工，出任子公司「金至尊數碼科技」企業發展副總裁。Allen笑言，轉工之初，朋友仲以為佢做咗集團副總裁，算係個美麗誤會。
馮英倫（右）同吳傑莊拍住上搵真銀。（受訪者提供）
年僅三十歲嘅Allen工作經驗豐富，離開政府後，先後出任港區全國人大代表王庭聰嘅選舉助理，同埋亞太交流與合作基金會執行副主席肖武男嘅助理。佢話本來基金會想喺香港成立據點，後來因事擱置，咁啱Kennedy搵佢幫手，於是一拍即合，但佢依然喺基金會做義務工作。
Allen同Kennedy早年喺香港大學學生會上認識，同金至尊數碼行政總裁吳傑莊又係香港青年聯會會員，當然拍心口應承啦。Allen依家主力負責網上零售業務，集中火力開發內地市場。喺商界撈得咁掂，佢好肯定話短期內都冇重返政府嘅打算。Allen自爆有個拍拖三年多嘅女友，但佢話想專注事業，打算遲多一、兩年先成家立室喎！
