政壇：田二少加國慶生展童心
大前日係立法會議員「田二少」田北辰六十三歲生日，但佢就無留港慶祝，而係選擇遠赴溫哥華同家人共享天倫，仲自爆每年生日都會去溫哥華史丹利公園踩單車。佢話雖然只得一個哥哥，但太太嘅家族就有八兄弟姊妹，全數喺溫哥華生活，又話自己每年都會去溫哥華同佢哋一齊過生日。
生日當天，田二少如常去溫哥華史丹利公園踩單車，但適逢今年係史丹利公園一百二十五歲生日，公園內特別擺放由中國當代藝術家岳敏君設計嘅大笑面孔雕像，佢於是就好似小朋友咁半蹲下同雕像合照，仲話自己即使六十幾歲都仲係童心未泯。
去完公園後，佢就去咗商場買波鞋，仲一口氣掃足三對咁多，佢話平日喺香港公務繁忙，抽唔到時間去買波鞋，喺外國就可以慢慢揀。當佢準備畀錢時，剛出嫁嘅三女Lavina堅持同老公幫佢找數，令到佢心都甜晒。
