政壇：梁美芬寸一舊雲冇料
通識科自○九年落實至今，社會仍議論紛紛。立法會議員梁美芬尋日接受電台電話訪問時，又再就呢個問題同學民思潮黃之鋒隔空舌戰，拗到面紅耳熱。不過，呢場舌戰就多咗個「塘邊鶴——白鴿黨立會議員「一舊雲」。黃碧雲喺節目完結後加入舌戰，仲鬧梁美芬唔識政治兼吱吱喳喳，一舊雲認真無事生非。
設計圖片及對白
話說梁美芬接受電台節目電話訪問時，首先解釋咗自己日前組織「關注通識教育聯席會議」嘅目的，話自○九年就接到好多關於通識科嘅投訴，有家長認為當中涉及太多政治，亦有家長反映曾有老師用粗口教通識，所以佢爭取將通識科剔除於必修科，讓學生有選讀科目嘅機會。點知言論就被出席節目嘅黃之鋒質疑，批評此舉會令學生更少接觸國情嘅機會，又話梁美芬既然咁緊張國情教育，點解唔爭取中史科做必修科喎！
質疑只識叫政治口號
梁美芬一怒之下，就話黃之鋒屈佢，仲叫「小朋友」聽清楚佢講嘢。黃之鋒聽到梗係好不滿啦，即時叫梁美芬唔好咁稱呼佢，梁美芬最後都改咗口叫番佢做黃之鋒同學。
呢場舌戰本應隨節目完結告一段落，但一舊雲下晝同傳媒茶敍時竟主動提及事件，仲話梁美芬成立聯席會議時，認為通識科涉及太多政治問題，因而想變成學生自選科目，係根本唔識乜嘢係政治，但又成日吱吱喳喳，仲叫梁美芬返去讀吓書先添！
梁美芬亦唔示弱，即刻喺傍晚發聲明，重申自己對通識科嘅睇法後，喺最後一段就寫出針對一舊雲說話嘅回應，質疑一舊雲講嘅嘢根本係一堆政治口號，內容自相矛盾、毫無實際之餘，而且不值一提喎！
