SUN搞作：打橫嚟講：政治牛皮癬，Jetso唔當錢！
身為律師的立法會議員何俊仁因被揭發攜眷接受國泰航空的「過分慷慨」款待，自認係「做咁多年議員以來，最大的缺失」，吓！唔計秘密入中聯辦嗰單呀？佢之前仲死撐話係「敏感度不足」所致，皮膚病咩？敏感！
《孔子家語》早就講定：「與不善人居，如入鮑魚之肆，久而不聞其臭，亦與之化矣！」看來，成身政治牛皮癬，醫番嘥藥費啦！何俊仁同黨友涂謹申由死唔認錯，到「捐錢」當贖罪！大家有眼睇！
點解佢兩人願意「賠錢算數」呢？有人說，佢兩個仲有羞恥心喎！錯啦！係因為佢兩條友仲要求選票咋！
睇番「土共派」，葉國謙和葛珮帆？有民建聯頭目譚耀宗撐說「沒有違反黨規，不會處分」！而葛珮帆被揭同老公提早一星期先到德國玩，機票都係國泰支付的！請問國泰，佢同老公去德國玩，同你國泰公務有何關係？若無人踢爆，係咪就咁明益啲議員及其家人先？是否好似去咗好多鑊又斗零未畀過嘅石禮謙議員話齋；大家應「畀個獎」你哋呢？你唔答，我就問老廉「尋求答案」囉！
都係身為行會議員嘅「紅人」鄭耀棠夠「強國人」本色，由事發龜縮到尋日，以最後一個「疑似受益人」身份出嚟話：「出發前已做足申請」，所以，一定唔會「捐錢」（贖罪），仲話：「幾年行開，相安無事」。哦！原來有前科，佢好掂呀！一派薄熙來口脗，自己無錯，有錯都係「制度嘅錯」。呢班親中受益人咁寸，只因毋須向選民交代，故此，只須堅持維護強國人做事態度便是！
話何俊仁老實肯認衰，不如說佢笨實啦！佢只要學特首咁一招轉移視線，推出甚麼「向老廉道歉論」，又「追殺林老師」，咁咪無人再提陳茂波一樣囉！仲話做咗好耐政治人，仍仲咁低Ｂ！下次唔選佢啦！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
