SUN搞作：少膽虫手記：機械人大戰
「《爛果》，納命來！」做得虧心事多，少膽虫又一次喺睡夢中驚醒。少膽虫一邊抹去面上口水，一邊同身邊十九才子噴口水：「頭先發噩夢，入面嗰個死神拎住把鐮刀，係咁追住少膽虫。阿十九才子，你話個夢點解呢？」
十九才子正想抽水，樓下實Q衝入嚟大叫：「我哋畀渣古攻擊呀！」少膽虫以為佢寸緊我長揸壹全霉爛股票，無升值又無息派，好似日日畀淫賤黎攻擊咁：「好出奇咩？使唔使畀你睇吓我個股嘅傷痕呀？」
「唔係呀！」實Q氣沖沖咁話：「係動漫入面嗰啲渣古機械人呀！」少膽虫恍然大悟，緊張起嚟：「點解會打到嚟o架？我哋都無屈佢係領導人情婦！」實Q未趕得切出聲，門口刀光劍影，一個身長六吋嘅「高達」持鐮刀衝緊入嚟。
「點會同夢入面個死神一模一樣嘅？」少膽虫一驚，拔腿就跑，但衣領隨即被勾起。「你就係腦腫？我係愛國者『高達』！點解你哋唔愛國愛港？」
「淫賤黎叫我做o架咋！」少膽虫掙扎道：「我同你一樣，都係聽聽話話嘅機械人嚟咋！」
