邊個仲敢話政府跛腳鴨？之唔係講緊港大調查指出有六成人撐擴建堆填區，壓倒地方上嘅反對聲音囉！一路搞到焦頭爛額嘅環境局局長星爺，難得可以挾民意以令諸侯，仲唔有風使盡巾里？

星爺：你走啦，我唔使食你啲奶喇！我自己落區！

淋淨：星仔，你唔使奶媽湊喇咩？班地區人士依家好有勢力，無我咁打得，你夠人哋砌o架喇？

星爺：少擔心啦，家吓十個人入面有六個撐我，點都夠砌啦！

淋淨：但係你一擴建堆填區，班居民日日咁臭住，真係水樽、摺櫈乜都掟得出喎！

星爺：無嘢嘅，沉默嘅大多數已經畀我代表咗！

淋淨：唔好咁呀，逼到佢哋佔領堆填區，香港每日唔見幾萬億！

星爺：唔驚，我有一個絕對說服到佢哋嘅理由。

淋淨：係咩呀？

星爺：就係擴建之後，畀垃圾廢官做官邸喇！

淋淨：吓，咁咪仲更加無人想住附近……

第一手消息請下載on.cc東方互動iPhone/iPad/Android/Windows Phone Apps