城中鏡：BoBo嚴選新秀唔吼模
名媛BoBo李月最近投資七位數字成立新模特兒公司，並已羅致Mandy Lieu同Canon女Melanie於旗下。BoBo本身係模特兒出身，其後下嫁經營紅酒生意嘅李本勝，婚後生仔並退出模界一段時間，但佢一直有成立模特兒公司嘅構思，直到最近同相識多年嘅好友傾開自己嘅心願，兩人一拍即合，於是就着手進行，佢話：「我哋只係花咗三個月時間籌備，好有效率；亦唔怕市場競爭大，因為大家有唔同方面嘅優勢，我哋開業三個月，暫時成績唔錯。」
BoBo（左）最近成立模特兒公司，羅致到Melanie（右）加盟。
BoBo話會喺唔同地區發掘模特兒，又會同模特兒學校合作，挑選有潛質嘅學生，但唔會搵模，因為佢哋有佢哋嘅巿場。另外，佢有感依家模特兒傾向多元化發展，唔再單一從事模特兒工作，故佢計劃同電影公司合作，甚至自己投資製作電影。
Melanie坦言同舊公司合作已近十年，希望簽約新公司可以有新發展，佢話：「除咗模特兒工作之外，其實我好想做旅遊節目，因為我好鍾意旅行。我依家好努力咁學國語，希望可以令自己更進步。」佢又透露將會同拍拖五年嘅男友喺明年七月結婚。
