城中鏡：張路路睇清裝搵靈感
喺唔少人都視歐美時裝為國際潮流指標之際，香港時裝設計師張路路就力撐本土文化。日前佢帶領一班青年參觀喺歷史博物館舉行嘅清代宮廷服飾展覽時，有感而發話好多時大家覺得中國好唔掂，其實全世界最叻嘅現代設計師，都會參考古代服飾搵靈感。佢勉勵大家要以謙卑嘅心，多角度欣賞文化。
當日張路路主持咗一個創意工作坊，仲充當展覽導賞員，為在場青年介紹宮廷服飾嘅設計同風格。佢話雖然美感會隨住時代轉變，但自古以來嘅審美標準都係一樣，就係講求工整同平衡。佢透露，自己特別鍾意研究布料同花紋，首次參觀呢個展覽時，就花咗近兩個鐘，觀賞每件展品嘅手工同刺繡技巧。
作為潮流先驅嘅佢笑言，學生嘅表現甚有驚喜，譬如佢睇到件梅花鹿皮草時，側重留意工藝同梅花圖案，同學卻懂得分析剪裁同線條，成個專家咁款，確實令佢喜出望外。
