城中鏡：殿堂巨星賀中大金禧
中國人傳統「逢五逢十」必大事慶祝，今年係中文大學成立五十周年，兼和聲書院校舍開幕誌慶，校方當然隆重其事，將於十月七日晚上喺灣仔會展舉辦一場「殿堂演藝之夜」籌款晚會，為大學籌募發展經費。當晚應邀獻技嘅藝人粒粒皆星，表演嘅曲目更加橫跨古今中外，單睇名單已經咁有「卡士」，相信籌得嘅善款將會好可觀。
梅葆玖
徐小鳳
中大日前已經廣發晚會嘅邀請函畀各界人士，並列明演出嘉賓嘅詳細名單。校方形容呢次金禧晚會，將會係史無前例嘅「世紀盛會」，屆時將有一代京劇大師之稱嘅梅蘭芳之子梅葆玖粉墨登場，著名電影演員凌波會獻唱黃梅調，殿堂級歌手徐小鳳同林子祥分別演繹經典同流行時代曲，仲有國際男高音莫華倫表演意大利歌劇，粵劇名伶陳寶珠同梅雪詩則同場獻藝。以《千手觀音》舞蹈聞名嘅中國殘疾人藝術團，當晚亦會喺團長邰麗華嘅帶領之下，施展精湛舞技。
