城中鏡：梅酒配火鍋 陳振彬識歎
早前一個下晝見到觀塘區議會主席Bunny走入中環ifc一間超市，識飲識食嘅佢今次想搵啲乜嘢美食呢？點知搞錯晒。
嗒真啲
揀清楚
抱住走
入到超市，Bunny嘅目標非常清晰，一個箭步就走到推廣日本酒嘅專櫃前，對住包裝精美嘅日本酒研究一番。專櫃服務員好殷勤咁招呼Bunny，向佢講解各種佳釀嘅特色，又倒出唔同種類嘅靚酒畀佢試飲。Bunny恍如品酒專家，先將鼻子靠近酒杯，感受酒嘅香氣，再小呷一口慢慢嗒，然後先至徐徐吞下。
威士忌加冰都好夾
試過幾個牌子之後，Bunny最終揀定售價近二百蚊嘅梅酒，於是一口氣掃咗四、五支，然後推住購物車去付款。待店員將梅酒放入紙箱內封好之後，佢即一手抱起紙箱，從容離開。問番Bunny，佢話佢一向都飲開呢隻梅酒，多數都係打邊爐嘅時候飲。佢教路話，將梅酒雪到凍先至飲，同火鍋係絕配。
佢仲話，除咗梅酒之外，以威士忌加冰嚟送火鍋都唔錯喎！雖然紅酒都係佢至愛，但就唔多適合用嚟配火鍋喇！
