政壇：搞搞政：對牛彈琴 學者唔買政府帳

作為政府，通常會同學者保持溝通，咁至可以聽到較為中立嘅意見。不過有學術界中人最近就同我哋講，今屆政府有個風氣，就係啲學者唔太想向政府建言，好重要嘅原因係今年初，中央政策組喺冇諮詢下，突然收番研究資助局每年二千萬元嘅審批權，而往往學者又最重視得到別人嘅尊重，所以政府咁做已破壞咗彼此嘅關係，喺學者心目中留下唔好印象。不過，學術界中人話，呢次事件並唔係致命傷，另一個同樣重要嘅原因，係今屆政府根本搵唔到可以同學者溝通得到嘅人，協助築起橋樑。

據了解，呢屆政府由中央政策組首席顧問邵善波同行政會議成員張志剛同學者有較多嘅接觸，但始終佢哋唔係學者，關係一定無咁密切啦！而且有部分學者更唔希望同政府有任何關係，驚黐得太埋影響到自己嘅仕途，依家政府仲要民望咁低，更難搵人願意同佢共患難，所以根本政府只可靠自己喎！

其實，以往中策組都有搵真正嘅學者加入，但今屆政府唔單止佢哋嘅首席顧問唔可以算為學者，連全職顧問都唔係學術界嘅專家，加上邵善波喺政界出名惹火，人哋想佢聽意見，佢就同人去辯論，簡直對牛彈琴，所以政府想搵學者幫手諗計，都唔係咁易。