政壇：聯網變獨立王國 何栢良轟自私
醫院管理局成日畀人批評山頭主義，資源分配唔勻，尋日何栢良就以公共醫療醫協會會董身份，喺電視台節目狂鬧醫管局，批評七個聯網變咗獨立王國，管理模式自私，架構百病叢生咁話。醫管局主席「肥胡」胡定旭出席一個活動時只係笑笑口咁話聯網行政總監已經坐緊「音樂椅」，時不時調任，目的就係減低山頭主義喎。外界盛傳肥胡將破格續任醫管局主席，唔知係咪人逢喜事精神爽，聽見何栢良句句插到肉都可以咁輕鬆應對？
何栢良尋日狂鬧醫管局，批評七個聯網變咗獨立王國。（資料圖片）
鬆毛鬆翼嘅肥胡尋日話「沒有最好，只有更好」，醫管局係大機構，唔可以一刀切改革所有嘢，但會不斷檢討管治，政府成立醫管局檢討督導委員會，局方都會盡力配合咁話。
肥胡今年十一月任期就屆滿，有傳佢會第三度連任，尋日被問及時佢就大賣關子，話要等政府決定，自己就唔評論咁多，總之樂於喺唔同崗位服務市民喎。不過佢尋日嘅舉手投足都已經答咗問題啦，連任唔係搞掂咗，點會咁輕鬆？
