政壇：盧偉國坐拿破崙寶座歎豬手
趁住立法會放暑假，工程界議員WK盧偉國早前同太太暢遊歐洲，分別到訪德法兩地，而佢哋完全喺自費嘅，唔係得到國泰航空嘅款待。喺柏林，WK除有去柏林圍牆影相外，仲去咗一間歷史悠久嘅餐廳品嘗當地美食。佢引述店主話，餐廳喺一六二一年開業，至今已有接近四百年歷史，又話著名法國政治及軍事家拿破崙都曾經係座上客。
盧偉國喺德國柏林觀光，誤打誤撞下去咗拿破崙曾經幫襯嘅餐廳。（受訪者提供）
拿破崙係十八世紀最受推崇嘅政治領袖之一，佢曾多次發動拿破崙戰爭，帶領國民對抗反法同盟，後來更創立法蘭西第一帝國，被稱為「拿破崙一世」。WK笑話，佢當時喺餐廳內坐嘅位置，就正正係當年拿破崙最鍾意坐嘅位，置身其中更可以發思古之幽情，想像拿破崙當年馳騁沙場嘅氣勢。
15歐元好抵食
雖然佢無問店主拿破崙鍾意食乜，但就叫咗一隻該店最拿手嘅烤鹹豬手配酸紫椰菜，佢話鹹豬手睇嚟皮脆肉滑，咬落去好似燒肉咁可口香脆。佢又大讚成隻鹹豬手只係盛惠十五歐元，可謂非常抵食。
