立法會議員利益申報同收禮再次成為公眾關注焦點，上禮拜六牛一嘅新民黨主席葉劉淑儀最近都大受困擾。事關黨嘅一班同事為佢搞生日派對，好多黨友都送禮物同生日卡畀佢，佢收禮物都收到手軟，但認為近日公眾對收禮同款待有更高標準，所以穩陣起見，將會申報晒所有禮物。

葉劉話一諗到要申報晒啲生日禮物就好頭痛。

下月坐郵輪遊地中海

葉劉話見到咁多人同自己慶祝生日，又收到咁多禮物，實在好開心，但一諗要申報晒咁多份生日禮物又好頭痛，估計只係得阿女Cynthia嗰份禮物至唔會招人話柄。講起阿女，葉劉下月初同阿女放大假三個禮拜，坐郵輪去歐洲地中海暢遊西班牙、意大利等國家。佢仲話生女着數啲，點都會陪阿媽喎！

我哋翻查過條例，原來行會成員收受超過二千蚊嘅禮物至要申報，而且如果喺特定節日如生日、結婚等場合收禮，都可以豁免申報。不過，行政長官就唔同，需要申報超過四百蚊以上嘅禮物。葉劉身為行會成員，但已用「特首」級數律己，認真唔話得囉。

第一手消息請下載on.cc東方互動iPhone/iPad/Android/Windows Phone Apps