政壇：教局政助如驚弓鳥
最近政壇不時浮現利益衝突疑雲嘅質疑，外訪接受免費款待如是，連出席中學生辯論比賽都唔例外？其實只係得啖笑，講緊係教育局政治助理Jeff施俊輝，佢因為比賽辯題同教育範疇有關，擔心立場有傾向性喎！
設計圖片及對白
香港青年動力協會早前舉行中學生辯論比賽冠軍賽，辯題為增加直資學校對教育發展嘅影響，獲邀出席做評判嘅有Jeff同民政事務局政治助理Caspar徐英偉。
徐英偉普通話唔多掂
Jeff一開始發言時就話要利益申報，因為自己有份參與制訂直資學校政策，事前亦唔知會用直資做辯論題目，笑稱或有利益衝突，因此會用番以前做通識老師嘅身份做評判喎。佢又話，參加辯論嘅同學搜集資料時，好多時都會引用教育局嘅數據，然後就鬧有乜做得唔夠，所以對於無同類事情發生感到好驚訝。
Caspar則大讚同學辯論水平唔差得過立法會，又自爆曾經係辯論隊成員，試過用中文同英文辯論，問題都唔大，不過如果要用普通話辯論，相信就要多啲時間準備喎！
又難怪佢哋好似驚弓之鳥咁嘅，喺今屆新政府成立之後，多名問責官員捲入涉嫌利益衝突風波，先係發展局前局長麥齊光，跟住到頂佢個位嘅陳茂波，繼劏房之後，跟住涉嫌醉酒駕駛，緊接又捲入新界東北發展計劃囤地風波，連佢嘅政助何建宗亦因為漏報家族生意而要鞠躬下台，特首即時話要修改申報利益制度，申報範圍擴展到親朋戚友，都咪話唔大劑。
話口未完，行政會議成員鄭耀棠同多名立法會議員最近又爆出「遊法團」，涉嫌收受航空公司嘅款待，雖然有部分議員想透過捐番啲錢嚟平息風波，但事件卻愈鬧愈大，都唔知點收科。前車可鑑，Jeff同Caspar梗係要更加謹慎，以免中彈啦！
