政壇：白雪梅唔知為乜水獻唱
退休警務人員協會前日喺尖沙咀舉行「警民同樂音樂會」，大會就請到粵劇名伶白雪仙嘅妹妹白雪梅到場獻唱《帝女花之香夭》同《鳳閣恩仇未了情》，但原來佢事前完全唔知去表演嘅團體係乜，到咗現場先至知。白雪梅係白雪仙同父異母嘅妹妹，八十年代後期到美國三藩市留學，其後移居加拿大，○九年隨大學畢業嘅囡囡回流返港，現時每星期都會喺文化中心教粵曲班。
白雪梅喺唔知情下，為退休警務人員協會獻唱首本名曲。
白雪梅話只係收到一個朋友邀請，佢覺得出席前日活動都無乜問題。小學女教師林慧思在街頭爆粗怒罵警員，唔知白雪梅又點睇呢？佢話自己淨係識搞藝術，政治敏感度弱，但佢覺得任何人都唔應該講粗口，尤其老師身為學生嘅榜樣，就更加應該有較高嘅道德標準喎。
