政壇：李文俊為囝囝升學探路
暑假外遊者眾，百仁基金主席、理文造紙主席李文俊（Raymond）都啱啱同家人去加拿大度假一周，同兩個讀緊小學嘅囝囝享受天倫樂，仲順道帶佢哋熟悉當地環境，打算未來安排佢哋去留學。
李文俊（Raymond）
有三個囝囝嘅Raymond話，佢唔係對香港教育制度冇信心，只係佢本身都喺外國畢業，覺得留學可讓小孩接受多元化教育，擴闊國際視野。近日有小學老師講粗口引起社會紛爭，Raymond話自己當年年少氣盛亦難免會「爆粗」，但依家為人父親，就要做好榜樣。佢透露，有時同老婆嗌交，佢會保持沉默離場，睇陣書冷靜吓，過一陣就會發現，其實都冇乜好嬲。佢笑言生氣令自己遍體鱗傷，人哋就安然無恙，倒不如唔好嬲好過喇。
