政壇：馬恩國爆完粗驚到腳震
小學女教師林慧思爆粗辱警引起各界關注，校方亦對佢作口頭警告，同樣喺大庭廣眾講咗句「You're not even a fxxking Chinese」嘅執業大律師馬恩國直言，感到好驚，擔心原本前程似錦嘅大狀仕途，會受林慧思事件拖累而被迫斷送！
馬恩國擔心林爆粗事件會影響到佢。（資料圖片）
馬恩國二月喺立法會公聽會上失控爆粗，敵陣隨即乘機向大律師公會投訴佢，公會其後決定就事件進行紀律研訊。事隔數月，馬恩國並冇因為林慧思獲「輕判」而放下心頭大石，反而擔心事件引起社會公憤會燒埋佢嗰疊，加上案件冇先例可援，公會分分鐘為殺一儆百而決定加刑，所以判決「可以好嚴重」咁話。
大律師公會主席石永泰尋日只係話公會一向唔對外公開研訊任何細節。
