政壇：公文袋佔中辯論賽輸清
佔領中環（佔中）行動引發各方關注，支持與反對都有捧場客，向來明撐佔中嘅公民黨（公文袋）尋日搞咗個辯論比賽，仲搵咗黨嘅立法會議員陳家洛同佔中支持者擔任評判，義務擔正佔中後援會「啦啦隊」隊長嘅公文袋副主席陳淑莊（Tanya）更落場辯論。呢個活動有冇為佔中造勢，明眼人都知啦，點知辯論見高下，兩個辯題最後都由反對佔中一方勝出，支持佔中一方輸到底。呢個結果咁反高潮，公文袋中人只好厚顏執生，話反方勝證明佢哋夠公道喎，乜嘢叫跌落地揦拃沙，有辦你睇喇。
設計圖片及對白
公文袋設定嘅辯論題目一係「公民抗命可以令社會變得更公義」﹖Tanya客串正方代表，反方亦有該黨執委楊岳橋（Alvin），本身係執業大律師嘅Alvin好勇猛，質問同學「如果當時南非係由薩達姆或穆巴拉克統治，你估曼德拉會唔會慘死獄中？」又問「陳勝、吳廣有份建立民國，你同唔同意？」正方同學當堂被九唔搭八嘅是非題搞到口啞啞。
厚顏唔認倒米
愈戰愈勇嘅Alvin眼見呢招啱使，就繼續開猛火攻擊：「如果馬丁路德金出生喺中國，仲有冇機會發表I Have a Dream嘅宣言？」處於捱打狀態嘅正方同學突然如夢初醒，寸爆Alvin「中國版」馬丁路德金根本冇可能識講I Have a Dream囉，秒殺以為贏梗嘅Alvin，但最終仍然由反方反勝。
另一場題為「佔領中環對香港發展利多於弊」嘅賽事，已簽署參與佔中嘅韓連山有份做評判，但辯論結果卻係反方勝出，兩場辯論賽都變相幫佔中倒米，造勢變咗失勢。不過，有公文袋中人就話，尋日只係一場比賽啫，反方勝出反而可以省靚佢哋辯論賽「公民盃」個招牌，真係神又係佢、鬼又係佢。
