城中鏡：潘石屹倡飲蔬果汁減磅
SOHO中國主席潘石屹最近好似轉咗行咁，唔sell地產，反而不斷喺微博宣傳佢嗰套獨門減肥秘方，唔少人會跟，但有營養師就話呢個減肥方法唔健康，叫潘石屹唔好教壞人喎！
潘石屹透露每日都飲六杯蔬果汁減肥。
佢嘅獨門秘方係每日都飲蔬果汁減肥，結果一個月後就輕咗足足五公斤喇！佢太太張欣都喺微博爆料，話佢哋兩公婆依家日日都飲兩杯果汁同四杯蔬菜汁，好輕鬆就可以減磅。不過，有營養師就話呢種減肥方法唔適合長期進行，仲會令到身體營養唔均衡啊。
話雖如此，潘石屹間唔中會喺微博show吓自己嘅跑步紀錄。哈！點解佢仲有力氣跑步呢？原來佢除咗飲蔬果汁，平時都有食正餐嘅，好似前兩日佢就放咗張食麵嘅相上微博喇，咁大家就唔使擔心佢會因減肥而體力不支啦！
