城中鏡：英領館展覽搵皇Ｂ做生招牌
尋日係英國皇室新成員喬治王子滿月嘅大喜日子，但其實「滿月」係好中國傳統，英國皇室嗰邊都冇乜慶祝，但係英國駐香港總領事館尋日就抽晒水，搞咗個「英國嬰兒用品展」，話趁小王子滿月請啲英國BB用品品牌嚟做展覽，地點仲要喺領事館入面，除展出皇室好鍾意用嘅BB車品牌外，連劍橋公爵夫人凱瑟琳使用嘅護膚品都關事。
相中呢款嬰兒車就係賣緊二萬五千元嘅英國皇室愛用嘅款式。
威廉王子 一家三口合照
全個展覽最有睇頭嘅，就係架賣緊二萬四千九百九十九港元嘅BB車，個款有成一百三十五年歷史，連當今英女王細個嗰陣都坐過呢款BB車。睇落個款又真係幾經典嘅，但在場嘅品牌發言人話好少見香港人買，多數都係外籍人士同內地同胞垂青。
至於聲稱係凱瑟琳使用嘅護膚品牌，香港未有得賣，在場無發言人又無銷售人員介紹，上網查吓發現一支都係二十幾英鎊，如果真係王妃用開，價錢認真相宜。
成個展覽唔開放畀公眾，只係招待記者同業內人士，現場所見記者多過買家，有參展商就話成個下晝接觸嘅買家一隻手數晒，唔知領事館搞今次展覽嘅目的究竟係乜呢？
