城中鏡：保安升呢 鐘錶界熱議防盜
早前有酒店商場內嘅錶行店舖喺三分鐘內被賊人掠奪幾百隻名錶，損失近千萬元，事件震驚整個鐘錶界。太子珠寶鐘錶主席Jimmy鄧鉅明同飛騰錶業品牌經理Gary劉燊濤講起呢單劫案時，都異口同聲話已即時檢討旗下店舖保安各個環節，全面提升保安戒備，當係食「驚風散」。
黃麗嫦（左起）、馮子琳同黃雅芝都係鐘錶界靚女。
高鼎國（中）同弟弟高偉國（左）難得同場，與同為業界新生代嘅劉燊濤（右）好啱傾。
鄧鉅明（右）為分店提升保安戒備，以防劫案或爆竊案發生。左為朱繼陶， 中為孫秉樞。
Jimmy話當日佢睇新聞知道有錶行發生爆竊案時，佢即刻召開緊急會議，全面審視旗下分店保安，例如測試警鐘，又制訂更嚴謹嘅保安規矩，包括收舖後嚴格執行將名錶存放於夾萬，以免匪徒有機可乘。
Gary就話當日佢哋亦即時檢討，由於旗下分店多數喺大型購物商場內，所以只要嚴守收舖後將錶收埋入夾萬，咁就唔使驚喎！
宣傳騷業界精英雲集
從事鐘錶界二十幾年嘅Jimmy話，早幾年香港曾劫案頻生，近年市面就平靜咗，的確令業界嘅保安警覺略有鬆懈。佢仲話今次有關爆竊案之後，仲有幾宗打劫未遂案件發生，而且係集體犯案，顯示食「大茶飯」之風又起，好值得關注。
講番尋日活動，貿易發展局為全球最大嘅香港鐘表展搞宣傳騷，鐘錶界人士齊集，包括香港鐘表業總會副主席高鼎國同黃麗嫦、前主席朱繼陶夫婦、九龍表行第三代傳人黃雅芝同馮良記錶行太子女馮子琳等人。
