政壇：搞搞政：沽新西豪宅 阿王睇淡樓市？
立會議員個人利益申報資料顯示，已由新界西搬到港島區居住嘅工聯會議員「阿王」王國興，早前沽出名下唯一一間屯門區物業，但遲遲未有喺港島買番層新樓，莫非身兼立會房屋事務委員會主席嘅佢，聽到內幕消息話樓價會大跌？
設計圖片及對白
阿王話早前賣樓同對樓市前景嘅睇法完全無關，而係純粹為咗兌現競選承諾，同埋方便往返立會大樓工作。事緣出身港島東區區議員嘅佢，喺○八年由勞工界功能界別改循新界西直選連任立會議員後，覺得每日由港島區嘅屋企往返新西服務選民好唔方便，於是○九年索性賣出原有嘅北角區物業，舉家搬往新界西屯門區一個自置物業，做個真正嘅新西人。咁喺舊年佢轉到港島區成功當選後，沽出咗屯門區嘅物業，暫時住喺佢太太名下嘅港島區單位。
之前屯門區個單位都算係區內豪宅，喺○九年買入，今年賣出應該升咗唔少。佢承認今次賣樓有錢賺，又話當年由北角搬往屯門係樓換樓，嚟緊亦有意重新喺港島區置業，高賣高買，賺來賺去都係帳面數字喎！咁幾時會買得成？佢就話慢慢嚟、睇定啲先都未遲喎！從有關答案估計，阿王對嚟緊嘅樓市都係看淡居多。
