政壇：陳淨心變大殺傷力武器
愛護香港力量召集人陳淨心自從被中聯辦請食閉門羹後，一直被網民恥笑「佢愛北京、北京唔愛佢」，或者北大人知道後都覺得佢好慘，所以特別派人安慰佢。內地半官方媒體《環球時報》尋日獨家訪問陳淨心，佢喺訪問中連建仔主席譚耀宗都夠膽踩，認真夠霸氣。唔怪得之該報將個訪問擺喺軍事欄目，怕且連內地都覺得佢屬於大殺傷力武器。
陳淨心早前接受內地半官媒《環球時報》訪問。
有關報道都好畀面陳淨心，形容佢「面頰有點嬰兒肥、不時露出調皮笑容」，唔講以為佢訪問緊欣宜。陳淨心亦交足功課，批評公文袋係政棍兼訟棍，專鑽法律漏洞，為一己之私而損害港人利益，又寸爆譚耀宗成日着西裝打呔好古板。除咗點評左中右政黨，佢仲開腔剖析愛港力同愛港之聲有乜分別，佢話愛港力係「人若犯我、我必犯人」，而愛港之聲係「打不還口、罵不還手」，兩者自然「不相為謀」。
可能因為個訪問實在太爆炸性，《環球時報》特登將呢則新聞放喺「軍事新聞」欄目，至於訪問陳淨心點解屬於軍事新聞，相信該報先至最清楚。
