新界關注大聯盟好跟得上潮流,最近喺網上分享平台上載咗一系列名為「新界人,新界事」嘅節目。呢個節目講新界事、訪問新界人,上網留言嘅,睇得出主要都係新界人。不過,呢兩個星期內上載嘅四集節目,點擊率唔到一千,就算呢個節目只係製作畀新界人睇,都要加倍努力至得。

設計圖片

訪問節目係由身兼屯門鄉委會主席嘅大聯盟發言人何君堯主持,佢回應我哋致電查詢,話節目係希望畀更多海外同海內人士了解新界事務,因為佢哋考慮到港人如果凡事都要睇文件先知港府新界政策嘅話,實在太複雜。所以,佢哋就簡化啲政策至三至五分鐘片段。節目喺未來幾個星期會繼續提及其他新界事,例如新界村屋僭建問題、擴建堆填區計劃等。至於受訪嘉賓名單,就先會以大聯盟成員為主,等大家多認識佢哋喎。佢仲強調全部都係DIY製作,因為聯盟冇乜經費咁話。

製作過程自己人玩晒

講番呢四集節目,頭嗰兩集只有何君堯出現,講新界村屋僭建問題同介紹大聯盟嘅宗旨「屹立新界,關顧全港,凝聚共識,達致大同」,之後嗰兩集就有佢分別訪問曾樹和同鄧鎔耀。曾樹和話官員落區好,因為唔使乜都唔知,又可以多聽新界居民意見。而鄧鎔耀嗰集就提到特首梁振英上兩星期落區到天水圍出席地區論壇期間,場外發生嘅混亂場面,話當日因為啲示威者太激動,所以發生衝突,其實大家應該用和平嘅方式去向港府表達訴求。

此外,鄧鎔耀仲提及擴建垃圾堆填區問題,話住喺堆填區附近嘅新界居民真係好難忍,所以佢哋下個月會去英國同荷蘭,參考當地處理垃圾嘅方法同了解英國高速焚化垃圾嘅技術,順道探埋當地華僑。聯盟咁樣拉大隊去歐洲研究垃圾處理問題,仲話冇乜經費?唔多令人相信喎!

第一手消息請下載on.cc東方互動iPhone/iPad/Android/Windows Phone Apps