城中鏡：打風「走冰」 唐唐冇凍啡飲
今年首個八號風球終於喺尋日早上高掛，雖然下晝已經落番三號波，突如其來的半日假，唔少打工仔都好開心。不過唔係個個都咁鍾意打風，尋日中午至下晝時分，喺中環已見到唔少名人嘅身影，佢哋有啲整裝待發，食定晏晝準備返回「戰場」；有啲就趁難得嘅打風空檔，同子女共聚、親子一番。
唐英年飲咖啡好專一，冇凍啡寧願唔飲。
何猷亨（右）忙做暑期工，媽媽梁安琪把握機會同愛兒共聚。
洪丕正（左）風球下照返工，同女職員食完晏繼續開工。
前政務司司長唐英年下晝現身太子大廈，只見佢一支箭咁走入相熟咖啡店，打算買杯凍咖啡提神。點知咖啡店因打風冇冰粒供應，唐唐買唔到凍啡寧願唔飲，兩手空空離開。
渣打香港行政總裁洪丕正（Benjamin）同一名女職員雙雙經過太子大廈，二人行色匆匆咁走向銀行總行，邊行邊密斟。Benjamin話，其他同事唔使上班，不過佢就無假放，食完晏就要繼續返去開工。
猷亨照返暑期工
冒住打風返工嘅仲有賭王四太梁安琪長子何猷亨。到咗下午茶時間，我哋喺中環置地廣場遇見佢哋兩母子同兩位男士步入Cafe Landmark飲茶。原來猷亨做緊暑期工，連八號風球都堅持照返工，仲做到過晒鐘至食晏。不過猷亨似乎好忙，半粒鐘內將美食掃光，同媽媽揮手道別後離開。
